УИХ дахь МАН-ын бүлэг хуралдлаа. Өнөөдөр намын бүлгийн хуралдаанаар Үндсэн хуульд нэмэлт өөрчлөлт оруулах асуудлыг хэлэлцжээ.
Энэ талаар МАН-ын бүлгийн дарга Д.Тогтохсүрэн мэдээлэл өглөө. Тэрбээр "Өнгөрсөн сард улс төрийн намууд, олон нийт, иргэдийн хөдөлгөөний зүгээс Үндсэн хуульд нэмэлт өөрчлөлт оруулах шаардлагаа хүргүүлсэн. Үүнтэй холбогдуулан УИХ-ын даргаас захирамж болон ажлын хэсэг гарсан. Ажлын хэсгийн зүгээс гурван удаагийн хэлэлцүүлэг зохион байгуулсан бөгөөд үүний үндсэн дээр Үндсэн хуульд нэмэлт өөрчлөлт оруулах, Сонгуулийн тогтолцоог боловсронгуй болгох чиглэлээр олон нийтийн санал бодлыг сонсох нь зүйтэй гэсэн шийдвэрийг гаргасан. Энэ асуудлыг МАН-ын бүлэг өнөөдөр авч хэлэлцэж, тодорхой шийдэл гаргалаа. Тодруулбал Үндсэн хуульд өөрчлөлт оруулах хүрээ хязгаар, үндэслэл, олон нийтийн дэмжлэг чухал гэдэгт бүлгийн гишүүд санал нэгдлээ. Ингэснээр Үндсэн хуульд нэмэлт өөрчлөлт оруулах асуудлаар олон нийтийн санал сонсох хэлэлцүүлэг өрнүүлэх ажлыг улс орон даяар хийх нь зүйтэй гэсэн саналд хүрлээ. Хэрэв олон нийт дэмжвэл УИХ-ын гишүүд Үндсэн хуульд нэмэлт өөрчлөлт оруулах ажлыг эхлүүлж болно" гэлээ.
Сэтгэгдэл үлдээх