Энэ сарын 20-нд Монголын Үндэсний телевизийн  “Цаг үе, үзэл бодол” нэвтрүүлэгт “Хөгжлийн банк”-ны гүйцэтгэх захирал Н.Мандуул оролцсон. Тэрээр “Хөгжлийн банк” тойрсон өр зээл, эргэн төлөлт бусад асуудал ямар түвшинд явааг ярьсан нь анхаарал татлаа.

Н.Мандуулын яриагаар бол  “Хөгжлийн банк” байгуулагдсан цагаасаа хойш 11 жилийн хугацаанд 9,8  их наяд төгрөгийн эх үүсвэр татан босгожээ.  Эндээс 7,1 их наяд төгрөгийг буцаан эргэн төлсөн бол 2,7 их наяд төгрөгийн өглөгтэй юм байна. Өнгөрсөн хугацаанд 3000 орчим төсөл, арга хэмжээ санхүүжүүлж, 3,2 их наяд төгрөг эргэн төлөгдөөд хаагдсан аж. Одоогоор “Хөгжлийн банк”-ны баланс дээр 2,6 их наяд хүүтэйгээ нийлээд 3,1 их наяд зээлийн архив байгааг хэлж байна.

2022 оны нэгдүгээр сарын 20-нд “Хөгжлийн банк”-ны нөхцөл байдлыг олон нийтэд зарласан байдаг. Үүнээс хойш таван сарын хугацаа өнгөрч байгаа бөгөөд өнгөрсөн жилийн эцсээр “Монгол банк”-наас шалгалт хийжээ. Шалтгалтаар нийт 3,2 их наядын зээлээс 1,8 их наяд нь чанаргүй зээл болсон байна гэдэг дүгнэлт гарсан байна.  Энэ дүгнэлт гарсанаас хойш төлүүлэх арга хэмжээ эрчимтэйгээр идэвхижээд нийт зээлээс 273 тэрбум төгрөг нь төлөгдсөнийг Н.Мандуул хэллээ.

Эргэн төлөлтийн мөнгийг “Төрийн сан”-гийн тусгай дансанд төвлөрүүлж байгаа аж. Одоогийн байдлаар төрийн болон хувийн хэвшлээр хуваагаад үзэхэд төрийн байгуулагийн найм орчим хувь нь төлөгдсөн үлдсэн нь хувийн хэвшлийн зээл эргэн төлөгдөөд байгаа гэнэ. Гуравны нэг нь төрийн өмчит компанийн чанаргүй зээл юм байна.  Төрийн өмчит компанийн зээлийг төлүүлэхгүй бол “Хөгжлийн банк” -ны ирээдүй тун бүрхэг байгааг “Хөгжлийн банк”-ны гүйцэтгэх захирал Н.Мандуул онцолж байв.

Өнгөрсөн 8-9 жилийн хугацаанд “Хөгжлийн банк” Засгийн газрын шийдвэрийн дагуу зээл олгож байсан. Ингэхдээ төрийн өмчит компаниуд зээл авч байсан бөгөөд нийгмийн шинж чанартай үйл ажиллагаа хэрэгжүүлсэн байдаг. Ийм учраас эргэн төлөгдөх боломжгүй болж, өнөөдөр ийм их өр төлбөрт “Хөгжлийн банк”  ороод байгаа гэж ойлгож болно.

Гэхдээ “Хөгжлийн банк”-ны зүгээс Засгийн газарт саналаа хүргүүлсэн юм байна. Үүний дагуу тодорхой шийдвэр гаргуулж,  төрийн өмчит компанийн  зээлийг эргэн төлүүлээд эхэлжээ.