НИТХ-аар машин ачилтын төлбөрийг нэмж, 100 мянган төгрөг болгох санал гарч буй талаар Нийслэлийн ИТХ-ын төлөөлөгч Д.Пүрэвдаваа мэдээллээ.
Тэрбээр "Нийслэлийн ИТХ-аар автомашин ачиж, тээвэрлэх тухай журам орж ирж байна. Энэхүү журмаар иргэдэд ямар эерэг өөрчлөлт авчрах вэ гэдэгт би хариулж чадахгүй. Учир нь тээврийн хэрэгсэлтэй хүн бүрийг хохироосон, өмнөх журмыг чангатгасан нэмэлтүүд орж ирсэн байна. Үүнийгээ хэлэлцэж байгаа зарим төлөөлөгчид иргэд зөрчил гаргадаг тохиолдол багасна хэмээн тайлбарлаж байна.
Өнгөрсөн жилд 52 мянган тээврийн ачилт хийгдсэн байна. Энэ нь гурван тэрбум гаруй төгрөгийг иргэдээс булаагаад авчихсан байна хэмээн ойлгож болно. Гэтэл энэ гурван тэрбум төгрөгөөс нь Нийслэлийн төсөвт нэг ч төгрөг ордоггүй. Ачилтын 15 компани хувааж авдаг.
Улаанбаатар хотын авто зогсоол нь хүртээмжтэй, хот нь зөв төлөвлөгдсөн байсан бол бол иргэд өнөөдөр энэ төрлийн зөрчил гаргахгүй байх байсан. Журмын талаар дэлгэрүүлбэл, тээврийн хэрэгслийн ачиж байх үед эзэн нь ирвэл ачилтын мөнгөн дүнгийн 50 хувиар нь торгох юм байна. Жишээлбэл, 60 мянган төгрөг төлөх байснаас машинаа ачуулахаас өмнө ирвэл 30 мянган төгрөг өгөх юм байна. Түүнчлэн танилцуулгаас ойлгоход тээврийн хэрэгсэл ачилтын төлбөрийг нэмж 100 мянган төгрөг болгох гэж байна гэж ойлголоо. Гэхдээ энэ бол санал.
Ардчилсан нийгэмд аль болох иргэдэд ээлтэй байх, тээврийн хэрэгслийг нь ачихгүй байх тал руугаа зохицуулалт хийх хэрэгтэй. Гэтэл ийм зохицуулалт хийхгүй иргэдийн эрх ашгийг хязгаарлаад байна. Иймд энэхүү журмыг хэлэлцэж байх үед иргэн бүр дуу хоолойгоо хүргэх хэрэгтэй" гэлээ.
Сэтгэгдэл үлдээх